ஆங்கிலேயரை எதிர்த்து நாட்டுக்காக உயிரையே கொடுத்த, சுதந்திரப் போராட்ட வீரர் மாமன்னர் வீரபாண்டிய கட்டபொம்மன்.
வீரபாண்டிய கட்டபொம்மன் பற்றிய செய்திகள் ஆங்கிலேயர்களின் குறிப்புகளிலும்… கிராமத்து நாடகங்களிலும் மட்டுமே இருந்த நிலையில் வீரபாண்டிய கட்டபொம்மன் என்ற திரைப்படம் மூலம் பெரு மக்களுக்கு கொண்டு சேர்த்த பெருமை சிவாஜி கணேசனுக்கு உண்டு.
1959-ம் ஆண்டு பி.ஆர்.பந்துலு இயக்கத்தில், சிவாஜி கணேசன், ஜெமினி கணேசன், பத்மினி உள்ளிட்ட பலர் நடிப்பில் வீர பாண்டிய கட்டபொம்மன் திரைப்படம் வெளியானது. இதில், நடிகர் சிவாஜி கணேசன் வீரபாண்டிய கட்டபொம்மன் கதாபாத்திரத்தில் அப்படியே வாழ்ந்திருப்பார்.
அந்த படத்தில் அவர் பேசிய ‘கிஸ்தி, திரை, வரி, வட்டி’ என்ற வசனம் இன்றளவும் பிரபலம்.
வீரபாண்டிய கட்டபொம்மனாக தான் நடித்ததை பெரும் பேறாகக் கருதிய நடிகர் திலகம் சிவாஜி… கயத்தாறில் நெல்லை-மதுரை நெடுஞ்சாலையை ஒட்டி வீரபாண்டிய கட்டபொம்மன் தூக்கிலிடப்பட்ட இடத்தில் 47 சென்ட் நிலத்தை நடிகர் சிவாஜி கணேசன் விலைக்கு வாங்கி னார். அங்கு வீரபாண்டிய கட்ட பொம்மனின் 8 அடி உருவச் சிலையை நிறுவினார்.
இதன் திறப்பு விழா 16.7.1970-ல் நடந்தது. அன்றைய எம்.பி. என்.சஞ்சீவரெட்டி தலைமையில், முன்னாள் முதல்வர் காமராஜர் திறந்து வைத்தார். 1999-ல் இதை தமிழக அரசிடம் சிவாஜி கணேசன் வழங்கினார் சிவாஜி.
சிவாஜி கணேசன் ஒருமுறை திருநெல்வேலி அருகே உள்ள கயத்தாறு (கட்டபொம்மன் தூக்கிலிடப்பட்ட இடம்) வழியாக காரில் சென்றபோது, கட்டபொம்மனின் வரலாற்று நினைவுகள் அவரைப் பெரிதும் பாதித்தன.
அப்போது தன்னுடனே பயணித்த எழுத்தாளர் சக்தி டி.கே. கிருஷ்ணசாமியிடம், “கட்டபொம்மன் வரலாற்றை நாம் ஏன் ஒரு நாடகமாக எழுதக்கூடாது?” என்று கேட்டிருக்கிறார் சிவாஜி.
சிவாஜியின் சொந்த முயற்சியிலும், பெரும் பொருட்செலவிலும் மேடையேற்றப்பட்ட அந்த நாடகத்தின் பிரம்மாண்ட வெற்றியே, பின்னர் இயக்குநர் பி.ஆர். பந்துலு இயக்கத்தில் திரைப்படமாக உருப்பெறக் காரணமாக அமைந்தது.
உண்மையான வீரபாண்டிய கட்டபொம்மன் எப்படி இருப்பார் என்ற வரலாற்றுப் புகைப்படங்கள் இல்லாத நிலையில், மக்கள் மனதில் கட்டபொம்மன் என்றால் சிவாஜி கணேசனின் உருவமே பதியும் அளவுக்கு அந்தப் பாத்திரமாகவே அவர் வாழ்ந்து காட்டினார். “என்னை மக்கள் ஒரு நடிகனாகத் தாண்டி, கட்டபொம்மனாகவே பார்த்தார்கள்” என்று சிவாஜி பேட்டிகளில் இந்த சம்பவங்களைக் குறிப்பிட்டு நெகிழ்ந்திருக்கிறார்.
அப்பேற்பட்ட நடிகர் திலகம் சிவாஜி கணேசனின் பிறந்தநாளான இன்று அக்டோபர் 1 ஆம் தேதி அவருக்கு மகத்தான புகழஞ்சலியை செலுத்துவோம்!
