ஆங்கிலேயரை எதிர்த்து விடுதலைக்காக போராடிய தளி எத்தலப்ப நாயக்கரின் நினைவு அரங்கத்தை ஒழுங்காக பராமரித்து அதை பொலிவை பாதுகாக்க வேண்டும் என்று உடுமலை பொதுமக்கள் அரசுக்கு கோரிக்கை வைத்துள்ளனர்.
சுதந்திரப் போராட்ட வீரரும் தளி பாளையக்கார மன்னருமான மலையாண்டி வெங்கிடுபதி எத்தலப்ப நாயக்கரின் வீரம் செறிந்த வரலாறு இன்றளவும் முன்னுதாரணமாக அமைந்துள்ளது.
ஆங்கிலேயரை எதிர்த்தது மட்டுமல்ல… தூது வந்த தூதுவனையே தூக்கிலிட்டு, ஆங்கிலேயருக்கு தைரியமாக சவால் விட்ட வரலாற்றுக்குச் சொந்தக்காரர் எத்தலப்ப நாயக்கர். உடுமலை தாண்டி உலகம் முழுதும் இவரது புகழ் பரவியிருக்கிறது.
இப்பேற்பட்ட எத்தலப்ப நாயக்கரின் வரலாற்றை காலம் காலமாக போற்றி மகிழ… அவரது வீரத்தை இளைய தலைமுறையினரின் மனதில் பதிய வைக்க நினைவு அரங்கம் அமைக்க வேண்டும் என்ற கோரிக்கையும் மக்களால் வைக்கப்பட்டது.
அதன் பேரில் உடுமலையை அடுத்த தளி பேரூராட்சிக்கு உட்பட்ட காண்டூர் கால்வாய் அருகே 2 கோடியே 60 லட்சம் ரூபாயில் நினைவு அரங்கமும்… உடுமலை நகராட்சி அலுவலக வளாகத்தில் எத்தலப்ப நாயக்கர் முழு உருவச் சிலை கடந்த 2024 ஆம் ஆண்டு தமிழ்நாடு அரசால் அமைக்கப்பட்டது.
அரங்கம் அமைத்ததோடு சரி… அதன் பின் கடந்த இரு வருடங்களாக அரங்கத்தை பராமரிக்க எந்த நடவடிக்கையும் எடுக்காததால்… எத்தலப்ப நாயக்கர் நினைவு அரங்கத்தைச் சுற்றி புதர் மண்டியுள்ளது. இது பார்ப்பவர்களின் மனதை வேதனை அடையச் செய்திருக்கிறது.
நாட்டின் விடுதலைக்காக போராடிய நாயகர்களில் ஒருவரான எத்தலப்ப நாயக்கரின் நினைவு அரங்கத்தை தமிழ்நாடு உரிய முறையில் பராமரித்து, அதன் பொலிவை பாதுகாக்க வேண்டும்!
