தொட்டிய நாயக்கர் முரசு இணைய தளம் தொடக்க விழாவில் திராவிட இயக்க கருத்தியலாளரும், மதிமுகவின் நாமக்கல் மாவட்ட அவைத் தலைவருமான இராசிபுரம் ஜோதிபாசு அவர்கள் வாழ்த்துரையாற்றினார்.
அப்போது அவர்,
“விடுதலைக் களம் இயக்கத்தோடும் தொட்டிய நாயக்கர் முரசு பத்திரிகையோடும் தொடக்க காலத்தில் இருந்து நாம் தோள்கொடுத்து வருகிறோம். அந்த வகையில் தம்பி கொ.நாகராஜன் அவர்களை ஆரம்பத்தில் இருந்தே நான் அறிவேன்.
தம்பி கொ. நாகராஜனின் வரலாறு சாதாரணமானதல்ல. பெரிய பெரிய தலைவர்களின் வாழ்க்கை வரலாற்றைப் போலவே தம்பி கொ.நாகராஜனும் வரலாறு கொண்டவர்.
தொட்டிய நாயக்கர் முரசு பத்திரிகையை கொண்டு வருவதற்கு அவர் நடத்திய போராட்டங்கள், அவரது அரசியல் பணிகள் அனைத்தையும் நேரில் நின்று பார்த்தவன் நான்.
சாதாரண நபராக தனது பொது வாழ்க்கையைத் தொடங்கிய கொ.நாகராஜன் அவர்கள் இன்று தமிழகமே திரும்பிப் பார்க்க கூடிய சமூகத் தலைவராக வளர்ந்திருக்கிறார். அதில் நமக்கு பெரு மகிழ்ச்சி.
ஓர் ஒடுக்கப்பட்ட சமூகத்துக்காக தன் வாழ்நாளையே அர்ப்பணித்திருக்கிறார் கொ.நாகராஜன். அவருக்கு பண ஆசையோ, பதவி ஆசையோ வேறு எந்த உள்நோக்கங்களோ இல்லை. அவருக்கு இருக்கும் ஒரே லட்சியம் ஒடுக்கப்பட்ட சமுதாயமான இந்த தொட்டிய நாயக்கர் சமுதாயத்தை அரசியல் ரீதியாகவும் கல்வி ரீதியாகவும் பொருளாதார ரீதியாகவும் மேலே கொண்டுவர வேண்டும் என்பதுதான். இந்த ஒரே நோக்கத்துக்காகத்தான் அவர் இன்றுவரை பாடுபட்டுக் கொண்டிருக்கிறார்.
இப்படிப்பட்ட தலைவர் பின்னால் இந்த சமூகம் ஒட்டுமொத்தமாக அணிதிரண்டு நின்றால், இந்த சமூகத்துக்கு என்ன செய்ய வேண்டுமோ அவரால் அத்தனையும் செய்ய முடியும். அப்படிப்பட்ட திறமை வாய்ந்த தலைவர் உங்கள் சமூகத்துக்கு கிடைத்திருக்கிறார். அவரை தொட்டிய நாயக்கர் சமுதாயத்தினர் பயன்படுத்திக் கொள்ள வேண்டும் என்று கேட்டுக் கொள்கிறேன்” என வாழ்த்தி பேசினார்.
