அரசின் நலத்திட்டங்கள் அவசியமானவர்களுக்கு போய் சேர வேண்டும் என்பதுதான் அந்தத் திட்டங்கள் செயல்படுத்தப்படுவதன் நோக்கம்!
ஆனால் அரசின் எந்த ஒரு திட்ட வெளிச்சமும் இல்லாமல், ஒரு தகரக் குடிசையில் தடுமாற்ற வாழ்வு வாழ்ந்து கொண்டிருக்கிறார் 80 வயது மூதாட்டி ரங்கம்மாள்.
நாமக்கல் மாவட்டம் இராசிபுரம் ஒன்றியம் கோனேரிப்பட்டி ஊராட்சியை சேர்ந்த தொட்டியபட்டி கிராமத்தில் ஒரு சிறு தகர குடிசை. இங்கேதான் மூதாட்டி ரங்கம்மாள் வசித்து வருகிறார்.
இவருடைய கணவர் பழனி நாயக்கர் தற்போது இல்லை. இவர்களுக்கு ஒரே ஒரு மகள். அவரும் திருமணம் ஆகி வெளியூர் சென்று விட்டார். அவருடைய கணவரும் இறந்து விட்டதால் அவரும் அங்கே கஷ்டப்பட்டு வாழ்க்கை நடத்தி வருகிறார்.
இப்படிப்பட்ட குடும்ப சூழ்நிலையில் தனிமையில் வசித்து வருகிறார் மூதாட்டி ரங்கம்மாள். இப்படிப்பட்டவர்களுக்கு அரசாங்கம் துணை இருக்க வேண்டும் தானே?
ஆனால் அவருடைய வீட்டுக்கு பட்டா இல்லாததால், அவருக்கு வீட்டு வரி ரசீது தரப்படவில்லை. இந்த அடிப்படையில் மின்சார இணைப்பு, குடிநீர் இணைப்பு, ரேஷன் கார்டு என அடிப்படை சான்றுகள் எதுவுமே இல்லை. மிகவும் பிற்படுத்தப்பட்ட சமுதாயமான தொட்டிய நாயக்கர் சமுதாயத்தைச் சேர்ந்த மூதாட்டி ரங்கம்மாளுக்கு முன்பு போல் இப்போது உழைக்கவும் உடம்பில் தெம்பில்லை.
தனக்கு ரேஷன் கார்டு வேண்டும் அதன் வழியாக கிடைக்கும் இலவச அரிசி தன் முதுமையின் பசியை போக்கும் என அதிகாரிகளிடம் பலமுறை கோரிக்கை வைத்தும் அரசு இயந்திரம் இந்த மூதாட்டி ரங்கம்மாளை பார்த்து இரங்கவில்லை.
பச்சிளம் குழந்தைகளுக்கு மோதிரம் அணிவித்து மகிழும் நமது மாண்புமிகு முதலமைச்சர், இது போன்ற மூதாட்டிகளை முதியவர்களை கைவிடக்கூடாது!
அண்ணனாக, தம்பியாக, தாய் மாமனாக, உங்கள் வீட்டுப் பிள்ளையாக இருப்பேன் என கூறும் முதலமைச்சர் விஜய்… இந்த மூதாட்டிக்கு பிள்ளையாகவோ பேரனாகவோ இருந்து உதவி செய்ய வேண்டும்! அரசு அதிகாரிகளை முடுக்கி விட வேண்டும்!
செய்வாரா முதல்வர்?
