தமிழ்நாட்டின் லட்சக்கணக்கான இளைஞர்கள் எதிர்பார்த்துக் கொண்டிருந்த டி.என்.பி.எஸ்.சி. குரூப் 4 தேர்வு பற்றிய அறிவிப்பு அக்டோபர் 6 ஆம் தேதி வெளியாகிறது. இத்தேர்வு மூலம் தமிழ்நாடு அரசில் ஏறத்தாழ 10 ஆயிரம் காலியிடங்கள் நிரப்பப்படும் என எதிர்பார்க்கப்படுகிறது.
தமிழ்நாடு அரசின் பல துறைகள், மாநில பொதுத்துறை நிறுவனங்களுக்கான பணியாளர்கள் தமிழ்நாடு அரசு பணியாளர் தேர்வாணையம் (டி.என்.பி.எஸ்.சி.) நடத்தும் தேர்வுகள் மூலமாக தேர்ந்தெடுக்கப்படுகின்றனர்.
அதன்படி 2026-ஆம் ஆண்டுக்கான டிஎன்பிஎஸ்சி வருடாந்திர தேர்வு அட்டவணையில் இடம்பெற்றுள்ள 6 தேர்வுகளில் 5 தேர்வுகளுக்கான அறிவிப்புகள் வெளியிடப்பட்டு 3 தேர்வுகள் நடத்தி முடிக்கப்பட்டுள்ளது.
இன்னும் 2 தேர்வுகள் நடத்தப்பட இருக்கிறது. இந்நிலையில், அக்டோபர் 6 ஆம் தேதி அடுத்த தேர்வுக்கான அறிவிப்பு வெளியாகிறது.
ஒருங்கிணைந்த குரூப்-4 தேர்வுக்கான அறிவிப்பு டிஎன்பிஎஸ்சி இணையதளத்தில் வெளியிடப்பட இருக்கிறது.
க்ரூப் 4 தேர்வில் எந்தெந்த பதவிகளுக்கான தேர்வு நடைபெறும்?
இளநிலை உதவியாளர், தட்டச்சர், சுருக்கெழுத்து தட்டச்சர் (கிரேடு-3), கிராம நிர்வாக அலுவலர், வரைவாளர், பில் கலெக்டர், வனக்காவலர் உள்ளிட்ட பதவிகள் இடம்பெற்றிருக்கின்றன.
மேலும்… கடந்த 2024-ம் ஆண்டு முதல் பல்கலைக்கழகங்கள், தமிழ்நாடு மின்சார வாரியம், அரசு போக்குவரத்துக் கழகம் உள்ளிட்ட பொதுத்துறை நிறுவனங்களின் குரூப்-சி பணியிடங்கள் குரூப்-4 தேர்வு மூலமாக நிரப்பப்பட்டு வருகின்றன.
மேலும் பேரூராட்சி, நகராட்சி, மாநகராட்சி ஆகிய நகர்ப்புற உள்ளாட்சிகளில் உள்ள காலிப் பணியிடங்களும் டிஎன்பிஎஸ்சி மூலம் நிரப்பப்படும் என அரசாணை வெளியிடப்பட்டது.
அந்த இடங்களும் குரூப்-4 தேர்வின் கீழ் வருவதால் குரூப்-4 தேர்வு அறிவிக்கையில் 10 ஆயிரத்துக்கும் மேற்பட்ட காலிப் பணியிடங்கள் இடம்பெறலாம்.
இந்த குரூப் 4 பணியிடங்களுக்கு பெரும்பாலும் பத்தாம் வகுப்புதான் கல்வித் தகுதி. ஆனால் சில பணியிடங்களுக்கு பட்டப் படிப்பு, தொழில் நுட்ப தகுதிகள் கோரப்படுகின்றன.
கடந்த குரூப்-4 தேர்வுக்கு 13.89 லட்சம் பேர் விண்ணப்பித்திருந்தனர். அதில் 11.36 லட்சம் பேர் மட்டுமே தேர்வெழுதினர். இந்த ஆண்டு குரூப்-4 தேர்வுக்கு 15 லட்சத்துக்கும் மேற்பட்ட இளைஞர்கள் விண்ணப்பிக்கலாம் என்ற எதிர்பார்ப்பு நிலவுகிறது!
தமிழ்நாட்டின் மிகப்பெரிய வேலைவாய்ப்புத் திருவிழாக இது கருதப்படுகிறது!
