நகை அடகு வைக்க போறீங்களா? ஒரு நிமிஷம்… உங்களுக்காகவே இந்த நியூஸ்!

தங்க நகை என்பது அழகுக்காக என்பது பணக்காரர்களின் நிலைமை. ஆனால் தங்க நகை என்பது அவசர அடகுக்காக என்பதே இன்றைக்கும் ஏழைகளின் எதார்த்தம்.

கல்லூரி கட்டணமாக இருக்கட்டும்,  திருமணமாக இருக்கட்டும், விவசாய செலவாக இருக்கட்டும்… ஏழைகளுக்கும் நடுத்தர வர்க்கத்தினருக்கும் இது போன்ற அவசர செலவுக்கு உதவுவது நகையை அடகு வைத்து கிடைக்கும் அந்த பணம்தான்.

மேலும் தனியார் அடகு கடைகள், மார்வாடிகள் இவர்களிடம் நகையை அடகு வைத்து விட்டு அதை மீட்பதற்காக இன்னமும் பல குடும்பங்கள் போராடிக் கொண்டிருக்கின்றன.

 ஆனால் ஏழை மற்றும் நடுத்தர மக்களுக்காகவே அரசு கூட்டுறவு வங்கிகள் இந்த நகை கடன்களை கடந்த பல ஆண்டுகளாக குறைந்த வட்டியில் வழங்கி வருகின்றன.

இதில் முக்கியமான முன்னேற்றமாக… கூட்டுறவு வங்கிகளில் கிராமுக்கு அதிகபட்சம் ரூ.10,000 வரை வழங்கப்படும் என தமிழ்நாடு அரசு உத்தரவிட்டுள்ளது.
இதுகுறித்து கூட்டுறவுத்துறை அக்டோபர் 5 ஆம் தேதி வெளியிட்டுள்ள அறிவிப்பில்…

“கடந்த ஆண்டில் நகைக் கடன்களுக்கான அதிகபட்ச வட்டி விகிதம் 12%-ல் இருந்து 13% ஆக உயர்த்தப்பட்டிருந்தது. மேலும், தங்கத்தின் சந்தை மதிப்பில் 75% அல்லது கிராம் ஒன்றிற்கு அதிகபட்சமாக ரூ. 7,000/- எனவும், 6 மாத கால அவகாசம் கொண்ட கடன்களுக்கு மாதாந்திர சராசரி சந்தை மதிப்பைக் கணக்கில் கொண்டு 75% வரை கடன் வழங்கப்பட்டு வந்தது.

இந்நிலையில் நகைக் கடன்களுக்கு (Jewel Loan) ஒரு கிராமிற்கான கடன் தொகை அதிகபட்சமாக ரூ. 10,000/- வரை அல்லது நகைகளின் சந்தை மதிப்பில் 75% என மாற்றியமைத்து நிர்ணயம் செய்யப்பட்டுள்ளது.

வட்டி விகிதத்தில் சீரமைப்பு
 மாவட்ட மத்திய கூட்டுறவு வங்கிகள் தங்களது சொந்தக் கிளைகள் மூலம் வழங்கும் நகைக் கடன்களுக்கான வட்டிக்கும். தொடக்க வேளாண்மைக் கூட்டுறவுச் சங்கங்கள் (PACCS) மூலம் வழங்கப்படும் நகைக் கடன்களுக்கான வட்டிக்கும் இடையே பெரும் வேறுபாடு நிலவி வந்தது.

இதனைச் சீரமைக்கும் வகையில். JL-CC PACCS-க்கு மாவட்ட மத்திய கூட்டுறவு வங்கிகள் (DCCBs) விதிக்கும் வட்டி விகிதம். மாவட்ட மத்திய கூட்டுறவு வங்கி DCCB கிளைகளில் பொதுமக்களுக்கு வழங்கப்படும் நகைக் கடன் வட்டியைவிடக் குறைந்தபட்சம் 1.25% குறைவாக இருக்க வேண்டும் என உத்தரவிடப்பட்டுள்ளது.

அதே நேரத்தில், PACCS-ன் லாப வரம்பு (Margin) 2.25%-க்கு மிகாமல் இருக்க வேண்டும் எனவும் அறிவுறுத்தப்பட்டுள்ளது.

இந்த உயர்த்தப்பட்ட கடன் அளவானது, இனி புதிதாக வழங்கப்படும் நகைக் கடன்களுக்கும் மற்றும் ஏற்கனவே பெறப்பட்டு தற்பொழுது புதுப்பிக்கப்படும் (Renewal) கடன்களுக்கும் முழுமையாகப் பொருந்தும்” என அரசு அறிவிப்பில் தெரிவிக்கப்பட்டுள்ளது

அரசின் இந்த உத்தரவு ஏழை மக்களுக்கு பெரும் பயனுள்ளதாக இருக்கும் என்பதில் ஐயமில்லை.